Nikhua In Tahsaktu U Tun Lwin Ih Thuanthu Tawi

Kawlram mipi in duhdaw ih ziang tik lai khalih nikhua umtu dan ding, a thei tawk le thiam tawk ih in tah sak ring ring tu, ralrinnak in pe theutu Dr Tun Lwin in in thihsan mai hi, a nufa pawl lawng si loin, Kawlram pumpi hin kan ui zet ko ding. A thuhla mal lai, a mah thlahnak ah kan hun ngan sawng ve.

Dr Tun Lwin hi nikhua tahnak zungah Former Director-General tuanvo latu a rak si. Cozah hna a tuan nawn lo hnu khalah journal, internet le media hmangin ram pi hrang ih nikhua in sim thei ring ringtu, kan ram in mithiam kan neihmi pakhat a si.

1948 kumah Sagaing Division, Ngan Zun myone, Ka-la khua ah a suak. A pa hi U Thein Maung a si ih, a nui hmin cu Daw Aye Kyi a si. Unau 2 lakah a nih hi a upa sawn a si.

1964 kumah Laphung tlawng insin High School a ong ih, Kawlram pumpi ah Mathematics subject in thiam hleice (gold medal) a rak ngah.

1965 kumah Mandalay BEHS No 4 tlawng ihsin phun hra a ong. Kum 17 a si lai ihsin Mandalay ih nikhua tah nak zungah cazi a rak tuan thok. Cu cing cun Mandalay ih tlawng an phuan bet mi, zan ca zirnak a kai peh ih all subjects ah distinction a ngah.

1971 kumah B Sc, all subjects ah distinction hmuin a ong la la. Mithiam hleice a si ti theiin Mandalay University cun tlawng ih tuan dingin a sawm nain tuan loin nikhua tahnak lamah cun a tuan sawn.

1973 kumah USA, Florida ah fim zir dingin thlah a si ih, 1975 kumah nikhua tahnak lam ih thiam hleice, B Sc (nikhua tahnak lam) degree a va la. Cui hnu 1987 kumah a va zir bet sal.

1989 kumah Florida ih a tlawng kainak cun Doctor degree (nikhua tahnak lam) an rak pe ih, cui hleiah Professor sinak kum thum sung zir theinak, US ih tlawng in an rak pe.

Rangoon University ah kum 4 sung a peh hnu ah Ph D a ong ih, 2008 kumah Doctoral a theh. 2009 March 20 ah Yangon University in a vei khatnak ih an pek mi Physics subject ih mithiam sunloihnak a rak dawng.

2006 kum ah Kawlram nikhua tahnak zung ah permanent member a si. 2007 kum ah Asia ram pumpi huap ih leilung siatnak kilvennak lam Council ah Kawlram ih Chairman hna a kai. 1980 kum ihsin a pinsin tiang Kawlram nikhua tahnak ih tuanvo latu le thu thantu bik a si.

2008 kum, Nargis thlipi ra thleng ding khal kha U Tun Lwin hin a rak tah dik bik. A rel vekin Kawlram in siatnak nasa tuk kan tong thei so khaw, tiah cozah hnenah a rak rel rero nan, cozah lam hin duh vekin tan an la thei lo. Cozah a daithlan tuk hnu cun Kwlram mi senpi hin U Tun Lwin hi nikhua sim thantu bikah an ruat.

Hi vek mithiam hleice a si ruangah cozah kha hin a zoh men men ce lo. 1980 kum ihsin a thih tiangah thla tin ih nikhua umdan ding thu thantu hna a tuan ter ring ring. Kawlram lawng si loin Asia ram dang dangin an ri san zet mi a si ih, a hnatuan le tuanvo an pekmi pawl hi rel cawk loin a tam.

Kawlram mi senpi in kan duhdawt zet mi le, a hleicein nikhua thawi pehparaw poh poh cu a kam suak kan rak bawh ring ring mi, U Tun Lwin cun a ihkhun par ih a sungte le doctor pawlin an thlop rero tiang khalah kan ram nikhaw um dan le mi senpi tuanvo, thil tul le theih tul pawl, mipi zawn ruatin a tawlrel rero. 2019 October 4, zan lam 6 hrawngah, Grand Hanthar Hospital ah, a nupi fanau pawl le a duhdawt zetmi Kawlram mipi pawl in tan ta.

Hi vekih mithiam hleice, ram mipi duhdawtu kan nei nawn lo hi Kawlram hrangah cun riah a sia ih a ui um zet.

Be the first to comment

Leave a Reply

Your email address will not be published.


*