Juventus-in Ronaldo Thar An Hawl

Juventus neitu lakih pakhat Paolo Aicardi cun Ronaldo thar dang, kum 34 hnak ih nauhak, an club hrang an hawl thu a rel. Aicardi ih rel dan cun Juventus hin player ṭha ziangmaw zat an rak la lut ve zo. Asinan, Christiano Ronaldo an lak luh ihsi thawk khan player ṭha ṭha hin Real Madrid, Barcelona leh Manchester United tivek club hminthang tak tak hnak hmanin Juventus ih um hi an hun hril sawn ve rero thlang, a ti.

Aicardi cun, “A liam cia kum 8 ihsi kan rak ti zo mi, player ṭha lak bet cu C Ronaldo kan lak luh khan a vawrtawp kan thleng. Kan lei pek lamah kha cun Mirko Vucinic kha kan player lak luh pawl lakah mi theih a hung hlawh zet. Cui hnu cun, Carlos Teves, Sami Khedira le midang dang kan hun la lut vivo ih, cu cun, leitlun football zuamawknak ah player ṭha lei thei kan si zia a langter ko.”

“Tu ihsi cun kan hrangah ti thei lo a um lo, Matthijs de Ligt kan lak luh khan cu cu a tifiang ko. Tu ah hi cun Ronaldo ai awh ding, Ronaldo thar, kum lam khalih nauhak deuh sawn lak luh ding hi kan tum bik pakhat cu a si,” a ti.

Juventus ih an chairman Andrea Agnelli cun tui kum ih Ballon d’Or laksawng Ronaldo in a co cu a cotu ding bikin a co tiah a rel ih: “Kan kilkhawi dan le kan result hi a pehtlai aw thluh ve. Kan ṭhangso nasa ti cu UEFA in ranking an tuah danah a lang fiang ko. Tu ah hin panganak ah kan um ih, palinak ih um thei dingin kan zuam rero lai.”

“Kan club hminsinnak logo kha hi khui hmun khalah a lar tuk thlang. Lei tlun khuazakip ah lar vivo sehla kan duh. Cristiano Ronaldo vek player ṭha kan nei ih, a phu ruangah Ballon d’Or laksawng a ngah. Dawng sal sehla ti tla kan duh zet. Cun, leitlun huapin kan Juventus club kha hi a ṭhanso vivo thei nak ding kan tawlrel ve ih, cuih kan tumtah cu tu tiangah cun kan hlawhtling vivo lai ko,” a ti.

enasnews

Be the first to comment

Leave a Reply

Your email address will not be published.


*