Corona Virus Hnakih Rapthlak Tuluk Ram Ah Flu Virus (Tuk-kui) Thar Phunkhat An Hmu

Zamrang zetin a suan aw theimi Flu virus thar phunkhat cu Tuluk ram ah mifim thiam pawlin an hmu. An hmuhtharmi Flu virus phunkhat cu kan dung naite ah vok pawl ah an hmu ih minung hnen khalah a suan thei tiah mithiam pawlin an sim.

Research tuahtu mithiam pawl cun Flu virus cu phundang ah thleng aw in minung pakhat le pakhat suan-awknak ihsin leitlun a darh ding an phang zet.

Hmuhtharmi Flu virus cu atu hrih ahcun buainak a um hrih lo na’n minung hnenih suan theinak dinhmun a um ruangah a kiang naite ih kilkhawi a tul tiah mithiam pawlin an sim.

Vok ihsin suan-awk theimi a si ruangah vok vulh hnațuantu pawl cu an kiang naite ihsin kilkhawinak zamrangten tuah ding a that thu Proceedings of the National Academy of Sciences cazual ah research tuahtu mithiam pawlin an ngan.

Atui thilcang reromi Coronavirus suan-awknak cem dingin leitlun a buai rero laifang ah atu vekin a tihnung zetmi Flu virus thar an hmuhsalmi a si.

Leitlun in a tuarmi netabik Flu virus cu 2009 ah a rak cangmi vok tuk-kui a si ih thlaphan zetmi hnakin mithi an rak mal. Cui virus cu A/H1N1pdm 09 tiah an rak ko. Atu Tuluk ram ih an hmuhtharmi Flu virus thar cu 2009 ih rak cangmi thawn an bang aw ko na’n danglam-awknak malte a um tiah theih a si.

Atu hmuhtharmi virus cu atu hrih ahcun tihnung asilo na’n zoh men dingmi a silo thu Professor Kin-Chow Chang le research tuahtu pawlin an sim. Tuitum hmuhtharmi virus cu G4 EA H1N1 tiah hmin pek a siih thawthawtnak lamzin tuamtu cell pawl ah a nung thei tiah theih a si.

Tuitum hmuhtharmi Flu virus cu ziangtik lai caan khalah a darh thei ih minung pakhat le pakhat cu olsam zetin a suan-awk thei ruangah leitlun a darh thei tiah theih a si. Ref : BBC

 

Be the first to comment

Leave a Reply

Your email address will not be published.


*